ठमेल काण्डः अखिल नेतालाई उन्मुक्ति दिन प्रहरीसँग खोसिएको थियो पक्राउ लिष्ट

डीएनए खबर

०५ फागुन २०८१

काठमाडौं- शक्तिको आडमा उन्माद देखाउँदै प्रहरीमाथि नै कुटपिट गर्ने गिरोहका नाइकेलाई उन्मुक्ति दिन तयार भइसकेको कागजात समेत सच्याएको खुलेको छ । 

गत माघ २४ गते राति ठमेलमा प्रहरीमाथि भएको सांघातिक आक्रमणमा अनेरास्ववियुका नेता कमलराज जोशी पनि संलग्न रहेको सिसिटिभी फुटेजमा देखेपछि प्रहरीले उनलाई पक्राउ गर्ने तयारी गरेको थियो । जसअनुसार प्रहरी वृत्त दरबारमार्गले सुरुवाती क्रममा अभद्र व्यवहारको कसुरमा भन्दै पाँच जनाको नाममा पक्राउका लागि अनुमति माग्ने तयारी गरेको थियो । जसको पहिलो सूचीमै एमालेको विद्यार्थी संगठन अनेरास्ववियुका स्थायी कमिटी सदस्य कमलराज जोशीको नाम थियो । 

जोशीसहितका व्यक्ति पक्राउ नपर्दा फरार हुने, फेरि यस्तै प्रकृतिका घटना गराउन सक्ने भन्दै पक्राउ अनुमति मागका लागि कागजात तयार पारिएको थियो । तर ‘माथिल्लो तह’बाट दबाब आएपछि प्रहरीले तयार पारेको उक्त कागजात सच्याउँदै जोशीको नाम हटाएर बाँकीको हकमा पक्राउ अनुमति माग गरेको थियो । 

त्यतिबेला ताप्लेजुङको फुङलिङ नगरपालिका–१ घर भएका २६ वर्षीय दिनेश सिग्देल र डडेल्धुराको गन्यापधुरा गाउँपालिका–५ का २२ वर्षीय रमेश फुलारा, नवीन ऐरी, सौजन्य शाही, गोपालबहादुर शाहीविरुद्ध पक्राउ पुर्जी माग गरिएको थियो । उनीहरूमध्ये सिग्देल र फुलारा पक्राउ परेका थिए ।

एक अनुसन्धान अधिकृतका अनुसार प्रहरी कुटिनुको मुख्य कारण नै नेता जोशीको भूमिका थियो । तर दबाब आएपछि तयार भएको कागज समेत सच्याएर बाँकीलाई मात्रै पक्राउ पुर्जी जारी भएको थियो । नेता जोशीलाई उन्मुक्ति दिएको आरोप लागेपछि सुरुवाती क्रममा जिल्ला प्रहरी परिसर काठमाडौंले भने जोशीले छुट्याउन खोजेको देखिएको दाबी गर्दै पक्राउ पुर्जी माग नगरिएको दाबी गरेको थियो । 

त्यतिबेला परिसरका प्रमुख तथा एसएसपी विश्व अधिकारीले भने प्रारम्भिक अनुसन्धानको क्रममा रहेको र अनुसन्धान गर्दै जाँदा जोडिएमा जोकोही भए पनि कानुनी दायरामा ल्याउने दाबी गरेका थिए । 

गत मंगलबार परिसरमै भएको पत्रकार सम्मलेनमा भने एसएसपी अधिकारीले अपराध गरेको देखिएमा कसैलाई पनि नछोड्ने जिकीर गरेका थिए । अपराध गरेको पाइएमा पार्टी नहेरी एक सय, दुई सय प्रतिशत होइन, हजार प्रतिशत कारबाही गर्ने ठोकोवा गरेका थिए ।  एसएसपी अधिकारीले यस्तो दाबी गरेपनि एमाले निकट अखिलका नेता जोशी पक्राउ परेका थिएनन् । जसको सञ्जालदेखि संसद्सम्ममा आवाज उठेको थियो । उनलाई शक्तिको आडामा उन्मुक्ति दिएको भन्दै सांसद्हरुले नै सरकारमाथि आक्षेप लगाएका थिए । 

संसद्देखि समाजिक सञ्जालसम्मबाट चौतर्फि दबाब बढेपछि अन्ततः गत बिहीबार प्रहरीले नयाँ बानेश्वरबाट अखिल नेता जोशीलाई पक्राउ गरेको थियो । जिल्ला प्रशासन कार्यालय काठमाडौंबाट ७ दिनको म्याद लिएर जोशीविरुद्ध पनि अहिले प्रहरीले अनुसन्धान अघि बढाएको छ । पक्राउ पुर्जी जारी भएका शाहीद्वय र ऐरी भने अझै फरार छन् ।

जोशीको समूहबाट २४ माघको राति प्रहरी हवल्दार जगुलाल चौधरी र जवान नगेन्द्रराज विष्ट कुटिएका थिए । दरबारमार्गस्थित केशरमहल बिटबाट ड्युटीमा खटिएको क्विक रेस्पोन्स टिमको टोलीमाथि यो समूहले आक्रमण गरेको थियो । मध्यराति हो–हल्ला गर्दै हिँडेपछि प्रहरीले उनीहरूलाई सम्झाउन खोजेको थियो । तर मोटरसाइकलमा सवार दुई प्रहरीको मोटरसाइकल लडाउँदै लौरो समेत फालिएको थियो । आक्रमणबाट प्रहरीको बर्दी च्यातिनुका साथै हेल्मेट समेत फुकालेर प्रहरीलाई हिर्काइएको थियो । जोशीले समेत प्रहरीलाई औंलो ठड्याउँदै चेतावनी दिएको सीसीटीभी फुटेजमा देखिन्छ ।

यसरी हाकाहाकी आक्रमणमा उत्रिएका जोशीलाई एमालेका उपल्ललो तहका नेताहरुकै जोडबलमा जोगाउन खोजिएको थियो । चौतर्फि बिरोध भएपछि उनलाई पक्राउ गर्न सरकारले अनुमति दिएको थियो । ज्यान मार्ने उद्योगदेखि कीर्ते र अभद्र व्यवहारको कसुरमा पटकपटक मुद्दा दायर हुँदै धरौटीमा छुटेका जोशी अहिले फेरि प्रहरी कुटपिटको घटनामा पक्राउ परेका छन् । उनीमाथि अहिलेसम्म ५ वटा मुद्दा लागेको छ । ज्यान मार्ने उद्योगमा मात्रै २ पटक मुद्दा परेको छ ।

तर, एमाले निकट अखिलका नेता जोशी यति शक्तिशाली देखिएका छन् की उनले सुरुमा पक्राउ पर्नबाटै जोगिन कागज सच्याउन लगाए । त्यसो गर्दा पनि जोगिन नसकेपछि आफूले कुटेका प्रहरीमाथि पनि छानविन गर्न लगाएका छन् । प्रधानमन्त्री केपी शर्मा ओलीको आशिर्वाद पाएका जोशीको इच्छा बमोजिम कुटिएका प्रहरीमाथि समेत छानविन थालिएको छ ।  

सीसीटीभी फुटेज किन सार्वजनिक भयो, कसले–कसरी सार्वजनिक गर्यो भन्दै जिल्ला प्रहरी परिसर काठमाडौंले छानबिन सुरु गरेको छ । भिडिओ सार्वजनिक भएपछि सामाजिक सञ्जाल, मिडियादेखि संसद्सम्म यो विषयले चर्चा पाएको थियो । 

त्यसको चौतर्फी दबाब थेग्न नसकेपछि उन्मुक्ति दिइएका अनेरास्ववियुका स्थायी कमिटी सदस्य कमलराज जोशीसहितका व्यक्ति पक्राउ परेका थिए । तर जुन भिडिओका कारण प्रहरी कुट्ने अखिल नेता कारबाहीको दायरामा आए, त्यही भिडिओलाई लिएर परिसरले अहिले छानबिन सुरु गरेको हो ।

परिसर स्रोतका अनुसार प्रहरी प्रधान कार्यालयबाट काठमाडौं उपत्यका प्रहरी कार्यालय रानिपोखरी हुँदै लिखित निर्देशन आएपछि छानबिन सुरु गरिएको छ । माथिल्लो तहबाट नै छानबिन गर्न भन्दै लिखत निर्देशन आएपछि छानबिन थालिएको प्रहरी अधिकारीहरु बताउँछन।